openreading

就讀小學五年級的子安，為參加台語文演講比賽所寫的稿子。在看稿、改稿的當下，深深感受孩子字裡行間流露一家人的親愛，羨慕至極。並且對這對「包山包海」的父母，給孩子「山海」的大禮，無限感佩。

我在花蓮牧靈之家的清晨，眺望窗外面對花蓮港的日出發呆的同時，聽到子安爸正對著窗外對子安訴說美崙溪出海口的河海交會……，以及花東縱谷平原的生成……。我看見三位一體的「生活、遊戲、學習」就在這對父母身上落實。我連忙收拾〝風花雪月〞的心，細看窗外的「風景」。～素津 104.11.17 

我上佮意做的代誌◎文：子安／文章潤飾：素津／攝影：子安媽 

佮我平平大漢的你，上佮意做的代誌是啥？我上佮意是peh山。因為，山內底有我足濟囡仔時代美好的記持。 

阮厝蹛山邊，自細漢我猶袂曉行路的時陣，阿爸就定定偝（āinn）我去peh山，毋管春夏秋冬，毋管烏陰、落雨，抑是好天，阿爸佮阿母攏會tshuā我去peh山。蹛佇山內真趣味，阿爸時常報我看真濟動物、樹木佮花草，伊tshuā我看鴟鴞按怎展翼佇山頂飛，報我看佮我手盤平大的人面蜘蛛，經網仔佇我頭殼頂的樹椏，tshuā我看予日頭曝甲規身軀金爍爍的蛇……。
 

我會當挽野花，欶花蕊內底甜甜的蜜佮酸甜仔酸甜的樹梅（m̂）。上幸福的是山林內底有足濟好聽的音樂，這攏是風、樹葉、溪水佮落雨聲，猶閣有鳥仔、蟲仔優美的歌聲。阿爸佮阿母tshuā我行過真濟起起落落無仝的地形，看蘭陽溪佇思源埡（óo）口，溪水共（kā）山沓沓沖割落來，愈割愈深、愈崎愈掣流……。 

阮鬥陣peh山，若拄著柴坎（khám）、石坎，我佮阿爸就會挈兩枝樹椏，嘟嘟tshìn tshiàng當做阿里山火車peh山崎、阿里山火車碰壁……。阮一路那行那耍，山閣較懸、路閣較遠，攏行會到！  

自按呢，我佮阿爸阿母peh過足濟大細粒山。我向望有一天會當去peh困難度上蓋懸的南湖大山。南湖大山是中央山脈北一段內底上懸的山，伊有3,742公尺喔，就親像7間台北101疊起來遐爾懸。  

今年歇熱，我的向望實現啊。peh南湖大山確實誠無簡單，佇進前，愛經過真濟、真久，真艱苦的訓練，訓練家己適應高山氣候佮氣壓的變化，閣愛訓練家己一個人會當面對烏烏、清冷的暗暝，一直到天光。  

我佇山裡大漢，山內底有我足濟足媠的記持，伊是我會當參伊偷偷仔講心內話的祕密所在，毋管我是歡喜抑是傷心，阮攏會倚近伊。

雖然我袂當像勇敢的泰山永遠蹛佇山裡，毋過我希望有一工，我會當像非洲納米比亞的查某囡仔TIPPI仝款，佮真濟動物做好朋友。 

邀請逐家做伙來peh山，佮山鬥陣耍。

◆感謝的話：此台語文稿，感謝許立昌老師協助台語文用詞、用字的潤飾及協助完稿。深深感謝。

◆承許立昌老師建議：「這是一篇難得的好散文，應該拿去投稿。」所以素津以《佮山鬥陣耍》為題投稿「海翁台語文學」雜誌。此文刊登在2016年六月號，第174期。